Asteartea, 2012ko urriak 11a.
Xake jokalari italiarra zen lider Sao
Pauloko txanda amaituta, baina norvegiarra indartsu ari da atzetik aurrera.
Josu Tornay. Donostia.
Magnus
Carlsen norvegiarrak, munduko lehenak, Fabiano Caruana italiarra harrapatu zuen
herenegun, Grand Slameko finalean. Caruanak lehen buelta ederra egin zuen Sao
Paulon (Brasil), eta bakarrik egon da gailurrean torneoa hasi zenetik. Baina
astelehenean, Bilbon, bigarren txandaren hasieran, Carlsenek gainditu egin zuen
italiarra, eta herenegun norvegiarrak berriz ere irabazi zuen bere partida,
Paco Vallejo balearraren kontra. Horrek eta egun berean Caruanak Sergei Karjakin
errusiarrarekin berdindu izanak norvegiar gaztea sailkapeneko gailurrean ipini
dute. Astearteko beste partidan, Viswanathan Anand indiarrak, munduko
txapeldunak, berdindu egin zuen Levon Aronian armeniarraren kontra. Anandek
torneo honetako partida guztiak berdindu ditu.
Bilboko
bigarren txandako partidak oso interesgarriak izan ziren. Carlsenek estu eta
larri gainditu zuen Vallejo. Balearrak aukera politak izan zituen partida
berdintzeko eta une batean baita irabazteko ere. Baina, denbora gutxi edukita,
akats pare bat egin zituen jarraian, eta Carlsenek ez zuen barkatu. Caruanak,
berriz, nagusitasunez irabazteko aukera izan zuen. Irekitze espainiarra erabili
zuen, eta Karjakinek defentsa berlindarra planteatu zuen. Piezak bizkor aldatu
ziren, eta posizioa nahiko lasaitu zen, italiarrak irabazteko aukera barik
geratzeko.
Atzo
atseden jardunaldia izan zen, eta antolatzaile eta xakelarien arteko futbol
partida jokatu zen. Gaur lehia ofiziala bueltatuko da, eta oso partida
interesgarriak espero dira. Caruanak eta Carlsenek beltzekin jokatuko dute
Anand eta Karjakinen aurka. Aronian eta Vallejo ariko dira beste partidan.
Sailkapena.
GRAND-SLAM-EKO
FINALA.
1. Fabiano Caruana (Italia) 12 puntu.
2. Magnus Carlsen (Norvegia) 12 pt.
3. Levon Aronian (Armenia) 9 pt.
4. Viswanathan Anand (India) 7 pt.
5. Sergei Karjakin (Errusia) 5 pt.
6. Paco Vallejo (H. Katalanak) 4 pt.